Во фокусот ‘ТРАНСАКТ’: Посета на делегација и увид во имплементацијата на проектот

Преку проектот „ТРАНСАКТ“, социјално загрозените семејства и лица во руралните средини добиваат поддршка преку бесплатни интегрирани мобилни социјално-здравствени услуги.

Од 2024 година, проектот го спроведуваат австриската невладина организација Local Action Group Regio 3 и Центар за развој и едукација – Прилеп. Во тесна соработка со општините Прилеп, Кривогаштани, Долнени и Градско, како и со ЈУ Меѓуопштински центар за социјална работа Прилеп, се имплементира пилот-модел на мобилни тимови за грижа во заедницата.

Услугите опфаќаат домашни посети од медицински сестри, физиотерапевтски третмани, психолошка поддршка, како и советување од социјални работници, специјални едукатори, рехабилитациски стручњаци и логопеди. Целта на проектот е одржливо подобрување на квалитетот на животот на најранливите категории граѓани. Проектот е финансиран од Социјално министерство на Австрија (Austrian Federal Ministry of Labour, Social Affairs, Health, Care and Consumer Protection).

Во рамки на проектните активности, Прилеп беше посетен од претставеници на  Амбасадата на Република Австрија, при што беше остварена средба на која беа претставени тековните активности и постигнатите резултати од проектот „ТРАНСАКТ“. Во продолжение на посетата, делегацијата реализираше средби и во општините Кривогаштани и Градско, каде се запозна со имплементацијата на услугите на терен и нивното значење за локалното население.

Во моментов, околу 200 корисници веќе ги користат услугите, а се очекува до септември да бидат опфатени приближно 700 лица. Дополнително, семејствата во социјален ризик добиваат и пакети со храна и хигиенски средства.

 При презентацијата на резултатите од проектот беше истакнато дека оваа иницијатива претставува пример на добра практика за грижа во заедницата и социјална поддршка, како и потврда за блиското партнерство меѓу Австрија и Северна Македонија, во контекст на европската интеграција на земјата.